Գլխավոր դատախազությունը հաստատել է 323 միլիոն դրամ արժողությամբ գույքի բռնագանձման հաշտության համաձայնությունը

Հակակոռուպցիոն դատարանը մարտի 5-ին հաստատել է 2026 թվականի փետրվարի 27-ին կնքված հաշտության համաձայնությունը։

Համաձայնության պայմաններով՝ պատասխանող կողմը՝ Կոտայքի մարզի Աբովյան համայնքի նախկին ղեկավար Կարապետ Գուլոյանի օգնական Մանուկ Հակոբյանը և նրա կինը, իրենց սեփականության տակ գտնվող Կոտայքի մարզի Նոր Հաճն համայնքի Քանաքեռավան գյուղում գտնվող շուրջ 20.6 հեկտար մակերեսով անշարժ գույքը, որի միջին շուկայական արժեքը կազմում է 323 միլիոն 800 հազար դրամ, հանձնել են Հայաստանի Հանրապետության սեփականությանը։

Այս գործը սկսվել է 2023 թվականի օգոստոսի 29-ին, երբ Գլխավոր դատախազությունը Հակակոռուպցիոն դատարան էր ներկայացրել ապօրինի ծագում ունեցող գույքի բռնագանձման հայցադիմում՝ Մանուկ Հակոբյանի և նրա կնոջ դեմ։

Հիշեցնենք, որ Կարապետ Գուլոյանի վերաբերյալ Հակակոռուպցիոն կոմիտեում քրեական գործ է քննվում, որը դատախազի կողմից հաստատված մեղադրական եզրակացությամբ հանձնվել է դատարան 2025 թվականի նոյեմբերի 6-ին։

Հակակոռուպցիոն դատարանը 2023 թվականի օգոստոսի 30-ին ընդունել էր հայցադիմումը վարույթ, իսկ մարտի 4-ին որոշում էր կայացրել գործից մաս առանձնացնելու և առանձին վարույթում քննելու մասին։

Հայցապահանջում ներառված մյուս գույքերի բռնագանձման պահանջի մասով քաղաքացիական գործի քննությունը շարունակվում է։