Եվրոպոլում կնշանակվի Հայաստանի կապի սպա

Հայաստանի ՆԳՆ-ն հայտնում է, որ Եվրոպոլում կնշանակվի Հայաստանի կողմից կապի սպա։ Այս մասին հայտնի դարձավ ՆԳ նախարար Արփինե Սարգսյանի և Հայաստանում ԵՄ պատվիրակության ղեկավար, դեսպան Վասիլիս Մարագոսի գլխավորած պատվիրակության միջև տեղի ունեցած հանդիպման ընթացքում։

Հանդիպման ընթացքում նախարար Սարգսյանը բարձր է գնահատել ԵՄ-ի հետ սերտ համագործակցությունը՝ ընդգծելով համատեղ ծրագրերի արդյունավետ իրականացումը և կոնկրետ ոլորտներում գրանցված տեսանելի արդյունքները։ Նա ներկայացրել է վիզաների ազատականացման ուղղությամբ իրականացվող աշխատանքները և վերահաստատել հանձնառությունը՝ հետևողականորեն շարունակելու նախատեսված քայլերը։

Քննարկվել են նաև ԵՄ կառույցների՝ Ֆրոնտեքսի և Եվրոպոլի հետ գործընկերության ամրապնդման հնարավորությունները։ Նախարար Սարգսյանը կարևորել է Եվրոպոլում Հայաստանի կողմից կապի սպայի նշանակումը՝ որպես այդ գործընկերությունը ամրապնդելու կարևոր քայլ։

Դեսպան Մարագոսը շնորհակալություն է հայտնել ՆԳ նախարարին արդյունավետ համագործակցության համար՝ ընդգծելով համատեղ ջանքերի արդյունքները։ Քննարկվել են թմրամիջոցների ապօրինի շրջանառության դեմ պայքարի ուղղությամբ միջոցառումներն ու գործընկերության ընդլայնման հնարավորությունները։

Հանդիպման ավարտին քննարկվել են նաև ԵՄ ներքին գործերի և միգրացիայի հարցերով հանձնակատար Մագնուս Բրունի առաջիկա այցի մանրամասները, որը, ըստ նախարար Սարգսյանի, կհանդիսանա համագործակցության նոր փուլի մեկնարկը։