Լեգենդար հրամանատար Աշոտ Մինասյանը տեղափոխվել է «Վարդաշեն» բանտ
Հոկտեմբերի 16-ին 2 տարվա ազատազրկման դատապարտված «Սիսական» ջոկատի լեգենդար հրամանատար Աշոտ Մինասյանը (առավել հայտնի է «Աշոտ Երկաթ» մականվամբ) տեղափոխվել է «Վարդաշեն» քրեակատարողական հիմնարկ։ Այս...
Հոկտեմբերի 16-ին 2 տարվա ազատազրկման դատապարտված «Սիսական» ջոկատի լեգենդար հրամանատար Աշոտ Մինասյանը (առավել հայտնի է «Աշոտ Երկաթ» մականվամբ) տեղափոխվել է «Վարդաշեն» քրեակատարողական հիմնարկ։
Այս տեղեկությունը հրապարակել է «Հայաստան» դաշինքի պատգամավոր Գառնիկ Դանիելյանը։ Ըստ նրա՝ Աշոտ Մինասյանը տեղափոխվել է Սիսիանի ոստիկանական բաժանմունքից։
Պատգամավորը նշել է, որ հրամանատարի պարագայում սա առաջին քաղաքական հալածանքը չէ, և այս իշխանությունների օրոք, նրա խոսքով, հայրենասերները հաճախ են հայտնվում բանտերում «շինծու մեղադրանքներով»։
Գառնիկ Դանիելյանը նաև նշել է, որ Աշոտ Մինասյանի հետ զրուցելիս անմիջապես զգացվում է նրա ցավը Արցախի կորստի կապակցությամբ։ Նրա խոսքով՝ իշխանությունները փորձում են «արցախյան պատերազմի մեջ անուրանալի ներդրում ունեցած» և «Երկաթ» մականվամբ հայտնի հրամանատարին զրկել ազատությունից՝ ապօրինի զենքի մեղադրանքով։
Հիշեցնենք, որ Աշոտ Մինասյանի նկատմամբ հանրային քրեական հետապնդում է հարուցվել այն բանի համար, որ նա, իբր, օրենքով սահմանված կարգի խախտմամբ, զենք է ձեռք բերել, փոխադրել և պահել Սիսիան քաղաքի Իսրայելյան փողոցում գտնվող ռեստորանային համալիրի հարևանությամբ գտնվող իր տիրապետման տակ գտնվող շենքում։
