Պետական եկամուտների կոմիտեն բացահայտել է թմրամիջոցների մաքսանենգության մեծ հարցում

ՀՀ Պետական եկամուտների կոմիտեն (ՊԵԿ) միջազգային գործընկերների հետ համագործակցության շրջանակում ստացված տեղեկատվության հիման վրա իրականացրել է օպերատիվ-հետախուզական միջոցառում, որի արդյունքում բացահայտվել է թմրամիջոցների մաքսանենգության մեծ հարցում։

ՀՀ ՊԵԿ մաքսանենգության դեմ պայքարի վարչության և Ազգային անվտանգության ծառայության համատեղ ջանքերով իրականացված միջոցառման ընթացքում հայտնաբերվել է, որ Նիդերլանդների քաղաքացի Ռ․Դ․-ն, որը նույն օրը Վիեննա-Երևան չվերթով էր ժամանել, հանգրվանվել էր Երևան քաղաքի հյուրանոցներից մեկում։

Որոնողական աշխատանքների ընթացքում քաղաքացին հայտնաբերվեց և, հիմնավոր կասկածի առկայության հիմքով, ենթարկվեց անձնական մաքսային զննման։ Ռենտգենային սկանավորման արդյունքում նրա որովայնի շրջանում նկատվեցին կասկածելի օտար մարմիններ։ Անհապաղ քաղաքացին տեղափոխվեց «Արմենիա» հանրապետական բժշկական կենտրոն, որտեղ բժիշկների կողմից նրա մարմնից դուրս է բերվել 50 պատիճ «կոկաին» տեսակի թմրամիջոց, որոնց ընդհանուր քաշը կազմում էր 845 գրամ։

Թմրամիջոցների մաքսանենգություն կատարելու անմիջականորեն ծագած հիմնավոր կասկածի առկայության հիմքով Ռ․Դ․-ն ձերբակալվեց։

«Վերահսկելի մատակարարում և գնում» անվանումը կրող օպերատիվ հետախուզական միջոցառման շրջանակում, որի նպատակն էր բացահայտել թմրամիջոցների ՀՀ ներկրումը և դրանց հետագա իրացումը կազմակերպելու հնարավոր անձանց, Երևանի հասցեներից մեկում ձերբակալվեցին ևս երկու քաղաքացի՝ Ա․Պ․-ն և Ս․Մ․-ն։ Նրանք նույնպես ձերբակալվեցին մաքսանենգություն և թմրամիջոցների իրացում կատարելու անմիջականորեն ծագած հիմնավոր կասկածի առկայության հիմքով։

Ձերբակալվածներին ներկայացրին ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչություն, որտեղ նրանց նկատմամբ ՀՀ քրեական օրենսգրքի 393-րդ և 399-րդ հոդվածների հատկանիշներով քրեական վարույթ է հարուցվել։ Նրանց բնակության վայրերում իրականացվել են խուզարկություններ։