Անահիտ Ավանեսյանը ներկայացրել է Հայաստանի առողջապահական մոտեցումները «Մեկ առողջություն» միջազգային գագաթնաժողովում

ՀՀ առողջապահության նախարար Անահիտ Ավանեսյանը մասնակցում է Ֆրանսիայի կառավարության կողմից կազմակերպված բարձր մակարդակի «Մեկ առողջություն» միջազգային գագաթնաժողովին, որը տեղի է ունենում Լիոնում։

Գագաթնաժողովի հիմնական նպատակն է խթանել մարդու, կենդանիների և էկոհամակարգերի առողջության փոխկապակցվածության գիտակցումը և միջազգային փորձի փոխանակումը։

Իր ելույթի ընթացքում Անահիտ Ավանեսյանը նշել է, որ կենսաբազմազանության պաշտպանությունը ոչ միայն մեր ապագայի կայունության, այլև առողջության հիմնարար նախապայման է։ Նա ընդգծել է, որ առողջությունը ազգային անվտանգության կարևոր բաղադրիչ է, և Հայաստանը պարտավոր է ապահովել կայուն և անվտանգ միջավայր ներկա և ապագա սերունդների համար։

«Հայաստանը պատրաստ է համագործակցել միջազգային բոլոր գործընկերների հետ՝ այս սկզբունքները վերածելու չափելի և գլոբալ արդյունքների»,- ասել է նախարարը՝ միաժամանակ ներկայացնելով հանրային առողջության ոլորտում Հայաստանի կողմից իրականացվող բարեփոխումները և մոտեցումները։

Գագաթնաժողովի ընթացքում քննարկվել են կենսաբազմազանության պաշտպանության, հակամանրէային դիմադրության և կայուն սննդային համակարգերի զարգացմանն ուղղված աշխատանքների անհրաժեշտությունը։ Անահիտ Ավանեսյանը մասնակցել է մի շարք երկկողմ և բազմակողմ հանդիպումների, որոնք, ըստ նախարարության, կնպաստեն համագործակցության նոր հնարավորությունների ձևավորմանը։

«Մեկ առողջություն» գագաթնաժողովը համարվում է բացառիկ հնարավորություն՝ վերաձևակերպելու գլոբալ ինստիտուցիոնալ համակարգերը և ձևավորելու միասնական մշակույթ։ Հայաստանը դիտարկում է այս հարթակը որպես գործողություններին ուղղված բազմակողմ համագործակցության կարևոր խթան և լիովին հանձնառու է այս օրակարգին։