Արթուր Օսիպյանը կալանավորվել է երկու ամիս ժամկետով

Արցախի հեղափոխական կուսակցության ղեկավար Արթուր Օսիպյանը կալանավորվել է երկու ամիս ժամկետով։ Այս մասին սոցիալական ցանցերում հաղորդել է փաստաբան Ռոման Երիցյանը։

Ըստ փաստաբանի՝ կալանավորման որոշումը կայացրել է Երևանի առաջին ատյանի դատարանի դատավոր Մանվել Շահվերդյանը։

ՄԻՊ ներկայացուցիչները պատրաստվում էին այցելել Օսիպյանին մեկուսարանում, սակայն նա հրաժարվել է նրանց հետ հանդիպումից։

Քննչական կոմիտեի տեղեկացմամբ՝ Երևան քաղաքի քննչական վարչությունում իրականացվող քրեական վարույթի նախաքննությամբ ձեռք են բերվել փաստական տվյալներ, որոնց համաձայն՝ 2026 թվականի մարտի 22-ին Ա.Օ.-ն իր Ֆեյսբուքի օգտահաշվի միջոցով, քաղաքական հայացքներով պայմանավորված շարժառիթով, հրապարակային գրառումներ է կատարել՝ ուղղակի դիտավորությամբ հնչեցնելով ՀՀ վարչապետի հասցեին բռնություն գործադրելու հրապարակային կոչեր։

Բացի այդ, նախաքննության ընթացքում պարզվել է, որ տեղեկանալով «Քաղաքացիական պայմանագիր» կուսակցության անդամների կողմից 2026 թվականի մայիսի 18-ին Արաբկիր վարչական շրջանում նախընտրական քարոզչություն կատարելու մասին՝ Ա.Օ.-ն, նախընտրական քարոզչություն կատարելուն խոչընդոտելու նպատակով, հրապարակում կատարելուց հետո ժամանել է Վրացական 7 շենքի բակ։ Այնտեղ, օգտագործելով քարոզչության հրապարակային բնույթը և հավաքված մեծաթիվ քաղաքացիների առկայությունը, նա խոչընդոտել է նախընտրական քարոզչության բնականոն ընթացքը։ Այնուհետև Ա.Օ.-ն հասարակության նկատմամբ դրսևորել է անհարգալից վերաբերմունք՝ հնչեցնելով հայհոյանքներ և անպարկեշտ արտահայտություններ, ինչը խաթարել է հասարակական կարգը։

Ա.Օ.-ի նկատմամբ հարուցվել է հանրային քրեական հետապնդում՝ Քրեական օրենսգրքի 330-րդ հոդվածի 2-րդ մասի 3-րդ կետով (բռնություն գործադրելու հրապարակային կոչերը), 297-րդ հոդվածի 1-ին մասով (խուլիգանությունը) և 211-րդ հոդվածի 1-ին մասով (քարոզչություն կատարելուն խոչընդոտելը)։

Հիշեցնենք, որ մայիսի 18-ին «Քաղաքացիական պայմանագրի» առաջնորդ Նիկոլ Փաշինյանի նախընտրական քարոզարշավի ժամանակ Արաբկիր վարչական շրջանում նրան էր մոտեցել Արթուր Օսիպյանը։ Նրանց միջև վեճ է ծագել Լեռնային Ղարաբաղի հետ կապված հարցերի շուրջ։ Իրավիճակը թեժացել էր, և Օսիպյանին հետ էին մղել Փաշինյանից։ Նրան բերման են ենթարկել այն բանից հետո, երբ ԱԺ նախագահ Ալեն Սիմոնյանը ուղիղ եթերով ցույց էր տվել դեպքից առաջ սոցցանցում արված Օսիպյանի գրառումը, որտեղ նա հրահանգ էր տվել գտնել և «փետուրներ հանել» վարչապետից։ Այնուհետև նրան անմիջապես ձերբակալել են, իսկ նրա Facebook-ի էջը՝ հեռացրել։