Երևանի ավագանու դեկտեմբերի 23-ի նիստում ընդունվել է օրենքի նախագիծ, որի համաձայն Երևանի քաղաքապետարանը կխստացնի հասարակական տրանսպորտում վճարումների նկատմամբ վերահսկողությունը։
Այս որոշումը կիրականացվի Հասարակական կարգի պահպանման ծառայությունում լրացուցիչ աշխատատեղեր ստեղծելու միջոցով։
Քայլի անհրաժեշտությունը, ինչպես նշել է Երևանի ավագանու «Իմ քայլը» խմբակցության ղեկավար Արմեն Գալջյանը, առաջացել է քաղաքացիների մեծ մասի դժգոհության պատճառով։ Ըստ նրա՝ ուղևորների 80 տոկոսը բարեխղճորեն վճարում է հասարակական տրանսպորտի ուղեվարձը և արդարացի բողոք ունի այն 20 տոկոսի նկատմամբ, որոնք չեն վճարում։
«Մենք, որպես քաղաքային իշխանություն, պարտավոր ենք արձագանքել քաղաքացիների այս բողոքին», – նշել է Գալջյանը՝ հավելելով, որ նրանց մեծ մասը, ովքեր չեն վճարում, օտարերկրացիներ են, որոնք օգտվում են առկա բացերից, և անչափահասներ, հիմնականում դպրոցականներ։
Ավագանու անդամը պարզաբանել է, որ քաղաքապետարանը պետք է անցնի ավելի կոշտ միջոցների և վարչարարության, քանի որ դա համապատասխանում է քաղաքացիների մեծամասնության ակնկալիքներին։
