Ընտրությունների նախօրեին՝ ճնշում և քաղաքական հետապնդում

Հունիսի խորհրդարանական ընտրություններին ընդառաջ Հայաստանում կոռուպցիոն խնդիրների 17 ուղղություն է բացահայտվել «Անտիկոռ» հակակոռուպցիոն հարթակի կողմից իրականացված ուսումնասիրության արդյունքում։ Այս մասին հայտարարեց փաստաբան Արսեն Բաբայանը «Կոռուպցիան նախընտրական շրջանում» թեմայով կազմակերպված մամուլի ասուլիսի ժամանակ։

Իմ վերլուծության համաձայն՝ իշխանությունների կողմից ընդդիմության և քաղաքացիական հասարակության վրա ճնշում գործադրելու հիմնական գործիքը քրեական գործերն են, որոնք, ցավոք, դարձել են քաղաքական հետապնդման ձև։ Այս գործերի շրջանակում ակնհայտ է վարչական ռեսուրսի չարաշահումը։ Տպավորություն է ստեղծվում, թե Հայաստանի Քրեական օրենսգիրքը օգտագործվում է որպես «ծանր մահակ»՝ ընդդիմության կողմնակիցներին վախեցնելու համար։ Իշխանությունները փորձում են ցույց տալ, որ յուրաքանչյուր ոք, ով աջակցում է ընդդիմությանը, կարող է ձերբակալվել։

Այս համատեքստում նշանակալի է նաև այն փաստը, որ այսօր գաղտնալսումների ենթարկվում են բոլոր ընդդիմադիր ուժերը։ Գաղտնալսումների տվյալների մշակումը և մոնտաժը բավականին երկարատև գործընթաց է, սակայն իշխանությունները ջանքեր են գործադրում դրանք հնարավորինս արագ հանրությանը հասցնելու համար։

Հակակոռուպցիոն կոմիտեն իր հրապարակումներում ոչ միայն տեղեկացնում է տեղի ունեցածի մասին, այլև անվանում է կոնկրետ քաղաքական ուժերին՝ շեշտը դնելով հենց նրանց անվան վրա։ Իրավիճակը հետաքրքրական է դառնում այն պահին, երբ նման գործողությունների ենթարկվում է ոչ միայն ընդդիմությունը, այլև իշխող կուսակցությունը։ Օրինակ, եթե նրանք էլ գաղտնալսվեին, հնարավոր է, որ Հակակոռուպցիոն կոմիտեն հայտարարությամբ հանդես չգար Թալին համայնքի ղեկավար Տավրոս Սափեյանի նկատմամբ, որը սոցիալական աջակցություն էր բաժանում ընտրությունների նախօրեին։ Նման գործողությունները, որոնք հաճախ կատարվում են ընտրությունների նախօրեին, հանցակազմ չեն համարվում։

ԱԺ նախագահ Ալեն Սիմոնյանի և իշխող կուսակցության մի քանի պատգամավորների կողմից ներկայացված օրենսդրական նախաձեռնությունը, որը նախատեսում է ընտրակաշառք տալու համար նախատեսված պատժի խստացումը, իմ կարծիքով, ուղղված է բացառապես ընդդիմության և քաղաքացիական հասարակության այն անդամների դեմ, որոնք չեն աջակցում գործող իշխանություններին։ Այս ամենը հերթական անգամ ցույց է տալիս մեկ հիմնական նպատակ՝ այլախոհ քաղաքացիներին վախեցնելու և ընտրական գործընթացը ճնշելու մտադրությունը։