Իշխող ուժը նպատակաուղղված սադրիչ գործողություններ է իրականացնում «Ուժեղ Հայաստան» կուսակցության համակիրների նկատմամբ

Իրավագետ, «Ուժեղ Հայաստան» կուսակցության անդամ Գոհար Մելոյանը հայտարարել է, որ իշխող «Քաղաքացիական պայմանագիր» կուսակցությունը նպատակաուղղված սադրիչ գործողություններ է իրականացնում Սամվել Կարապետյանի քաղաքական ուժի համակիրների նկատմամբ։

Նրա խոսքով՝ մայիսի 16-ին Տաշիր համայնքում իրավապահների կողմից ձերբակալվել են «Ուժեղ Հայաստան» կուսակցության 10 համակիր, որոնք իրազեկման արշավ էին իրականացնում հունիսյան խորհրդարանական ընտրություններին ընդառաջ։

«Մեր կողմնակիցները խաղաղ ակցիա էին անցկացնում, երբ նրանց մոտեցել են իշխող ուժի ներկայացուցիչները և սկսել բախման հրահրել։ Ի ապացույց՝ ես դեպքի վայրից տեսանյութ եմ հրապարակել», – ասել է Մելոյանը՝ Facebook-ի իր էջում տեսաուղերձում ուշադրություն հրավիրելով, որ իշխող կուսակցության կողմնակիցներն ունեին հնարավորություն շեղվել այդ ճանապարհից և գնալ այլ երթուղով։

«Սակայն նրանք նախընտրել են այլ ճանապարհ՝ նպատակաուղղված սադրանքներ մեր կողմնակիցների նկատմամբ, որոնք ամեն կերպ փորձում էին չտրվել նրանց և խաղաղ կանգնած էին մեր քաղաքական ուժի տարբերանշանային դրոշներով», – ընդգծել է նա։

Մելոյանի խոսքով՝ իշխող կուսակցության կողմնակիցները շարժվել են դեպի ամբոխը, սկսել են սադրել նրան, ինչի արդյունքում «Ուժեղ Հայաստանի» 10 կողմնակիցներ բերման են ենթարկվել։

«Ահա թե ինչ իրականության դեմ ենք մենք պայքարում։ Ամեն օր մեր քաղաքական ուժը քարոզարշավ և իրազեկման ակցիաներ է իրականացնում Հայաստանի մարզերում։ Մեր այցերի ընթացքում մենք հանդիպում ենք տարբեր մարդկանց, այդ թվում՝ իշխող կուսակցությանը սատարողների հետ։ Բայց մենք հարգանքով ենք վերաբերվում նրանց, քանի որ կարծում ենք, որ ուժեղ Հայաստանում մենք պետք է հանդուրժող լինենք միմյանց նկատմամբ, այլ ոչ թե իրար սադրենք կամ ատենք», – ընդգծել է կուսակցության անդամը։

Նա հայտարարել է, որ իրենք պահանջում են անհապաղ ազատ արձակել ձերբակալվածներին՝ նշելով, որ այսօրվա դրությամբ իրենց կուսակցության մոտ 300 կողմնակիցներ բերման են ենթարկվել կամ ձերբակալվել։

«Մենք կոչ ենք անում մեր հայրենակիցներին, ինչպես նաեւ տեղական և միջազգային դիտորդական առաքելություններին հետեւողականություն ցուցաբերել իրենց գործողություններում։ Մենք մեր աջակիցների կողքին ենք։ Ինչ վերաբերում է «Քաղաքացիական պայմանագրի» վարքագծին, ապա այն միայն ցույց է տալիս նրանց իրական կապը ժողովրդի և իրավունքի հետ։ Հենց դա է լինելու նրանց պարտության հիմքը, քանի որ մարդկանց ձերբակալելով՝ նրանք միայն ուժեղացնում են պայքարելու նրանց ցանկությունը։ Չէ որ նրանք հասկանում են, որ 300-ը կարող է դառնալ 3000, 300 000 և այլն», – եզրափակել է Մելոյանը։