Լեհաստանը կազմակերպել է զորավարժություններ՝ օտարերկրյա տեղեկատվական մանիպուլյացիային հակազդելու համար

Լեհաստանի արտաքին գործերի նախարարությունը, համագործակցելով Արտաքին գործողությունների եվրոպական ծառայության (EBC) և Հիբրիդային սպառնալիքներին հակազդման առաջավոր փորձի եվրոպական կենտրոնի (Hybrid CoE) հետ, կազմակերպել է խորհրդաժողով և զորավարժություններ։ Այս միջոցառումը նվիրված էր օտարերկրյա տեղեկատվական մանիպուլյացիայի և միջամտությանը հակազդելու հարցերին՝ հատկապես Հայաստանի խորհրդարանական ընտրությունների համատեքստում։

2026 թվականի մարտի 23-25-ն անցկացված միջոցառմանը ներկա էին Հայաստանի, Մոլդովայի, Ուկրաինայի, Միացյալ Թագավորության, ԵՄ ինստիտուտների և անդամ պետությունների ներկայացուցիչներ, ինչպես նաև վերլուծական կենտրոնների, քաղաքացիական հասարակության կազմակերպությունների փորձագետներ և լրատվամիջոցների ներկայացուցիչներ։

Մասնակիցները քննարկեցին թշնամական արշավներին արձագանքելու ռազմավարությունները՝ կենտրոնանալով թշնամական պատումներին հակազդելու և պետական կառավարման և երրորդ հատվածի գործընկերների հետ համագործակցության ճանապարհների վրա։ Սա արդեն երրորդ համանման զորավարժությունն էր, որը Լեհաստանի ԱԳՆ-ը կազմակերպել էր գործընկեր երկրների համար։

Զորավարժությունների շրջանակում մասնակիցները համատեղ մշակեցին տեղեկատվության մանիպուլյացիայի և օտարերկրյա միջամտության բացահայտման և հակազդման մեթոդներ։ Նրանք վարժվեցին արձագանքել նման սպառնալիքներին՝ օգտագործելով համալիր մոտեցումներ՝ կառավարության և հասարակության մակարդակով։

Այս զորավարժությունն Լեհաստանի կողմից Հայաստանին աջակցելու հանձնառության վերահաստատումն է և երկրի դիրքի ամրապնդումը որպես տեղեկատվության մանիպուլյացիային և արտաքին միջամտությանը հակազդելու միջազգային ջանքերի առաջատար։

Հիշեցնենք, որ ավելի վաղ “Ազատություն” ռադիոկայանը հաղորդել էր, որ իրենց տրամադրության տակ է հայտնվել ՀՀ ԱԳ նախարար Արարատ Միրզոյանի նամակը Բրյուսելին, որում նա խնդրել էր արագ արձագանքման խումբ ուղարկել Երևան՝ կրեմլյան ապատեղեկատվությանը և Հայաստանի խորհրդարանական ընտրություններին Ռուսաստանի միջամտությանը հակազդելու համար։ Այդ առնչությամբ հիշեցվել էր, որ ԵՄ-ը մոտ 20 հոգուց բաղկացած համանման խումբ էր ուղարկել Քիշնև՝ անցած տարվա խորհրդարանական ընտրությունների ժամանակ։ Հավելենք, որ ԵՄ գլխավոր դիվանագետ Կայա Կալլասը նաև հայտարարել էր Հայաստանին 15 մլն եվրո հատկացնելու մասին՝ «ռուսական քարոզչությանը հակազդելու համար»։

Մարտի 4-ին ՌԴ ԱԳՆ պաշտոնական ներկայացուցիչ Մարիա Զախարովան պատրաստակամություն էր հայտնել եվրոպականին համանման Ռուսաստանի առաքելություն ուղարկել Հայաստան, եթե Երևանը նման ցանկություն հայտնի։