Հայաստան-Էստոնիա հարաբերությունների նոր էջը. Երևանում բացվեց Էստոնիայի ռեզիդենտ դեսպանություն

Ապրիլի 9-ին Հայաստանի Հանրապետությունում տեղի ունեցավ Հայաստան-Էստոնիա հարաբերությունների պատմության մեջ նշանակալի իրադարձություն՝ Երևանում Էստոնիայի Հանրապետության ռեզիդենտ դեսպանության պաշտոնական բացումը։ Արարողությանը մասնակցել են ՀՀ արտաքին գործերի նախարար Արարատ Միրզոյանը և Էստոնիայի արտաքին գործերի նախարար Մարգուս Ցահքնան, որը Հայաստան է այցելել պաշտոնական այցի շրջանակում։

ՀՀ ԱԳ նախարար Արարատ Միրզոյանը նշել է, որ այս որոշումը Էստոնիայի կառավարության և անձամբ նախարար Ցահքնայի հանձնառության և Հայաստան-Էստոնիա հարաբերությունների զարգացմանը ցուցաբերած ուժեղ աջակցության հստակ արտացոլումն է։ Նա ընդգծել է, որ Էստոնիան միշտ աջակցել է Հայաստանին՝ ոչ միայն երկկողմ, այլև Հայաստան-ԵՄ հարաբերությունների շրջանակներում, աջակցելով հայկական պատվիրակության կողմից բարձրացված ցանկացած հարցին։

«Մենք բարձր ենք գնահատում ձեր աջակցությունը և ձեր դիրքորոշումը», – նշել է նախարար Միրզոյանը՝ շնորհավորելով Էստոնիայի Հանրապետության առաջին ռեզիդենտ դեսպանին և հայտարարելով, որ Հայաստանի արտաքին գործերի նախարարությունում նրան սպասում է ընկերների թիմ։

Ի պատասխան՝ Էստոնիայի արտաքին գործերի նախարար Մարգուս Ցահքնան նշել է, որ այս իրադարձությունը պատմական է ոչ միայն Էստոնիայի, այլև ամբողջ Եվրոպայի համար, քանի որ Էստոնիան, փոքր պետություն լինելով, այս տարի բացում է հինգ նոր դեսպանություն, որոնցից առաջինը հենց Հայաստանում է։ Նա նաև հավաստիացրել է, որ Էստոնիան աջակցում է Հայաստանին՝ որպես խաղաղության, եվրոպական արժեքների և բարեկեցության ճանապարհով առաջնորդող պետություն։

«Մենք ցանկանում ենք լինել ձեր ընկերները և աջակցել ձեզ», – ասել է նախարար Ցահքնան՝ նշելով, որ դեսպանության միջոցով ապահովվում է ամենաբարձր աջակցությունը։ Նա նաև ընդգծել է, որ Էստոնիան ունի ծրագիր ապրել այս տարածաշրջանում նաև առաջիկա 10,000 տարվա համար։

Արարողության ընթացքում կողմերը նաև հանդիպել են և քննարկել համագործակցության հեռանկարները՝ կենտրոնանալով կիբերանվտանգության և բիզնես ոլորտների զարգացման վրա։ Այսպիսով, Էստոնիայի ռեզիդենտ դեսպանության բացումը նշանավորում է երկու երկրների միջև հարաբերությունների նոր, ավելի ամուր և ռազմավարական փուլի մեկնարկը։