Ուժեղ Հայաստան կուսակցությունը կենտրոնանա կանանց զբաղվածության ապահովման և գյուղատնտեսության խնդիրների լուծման վրա

Արագածոտնի մարզի Արագածավան գյուղում կայացած հանդիպման ընթացքում «Ուժեղ Հայաստան» կուսակցության ընտրական ցուցակի առաջին համար Նարեկ Կարապետյանը ներկայացրել է կուսակցության հիմնական նպատակներից մեկը՝ կանանց զբաղվածության ապահովումը։ Նրա համոզմամբ՝ համայնքների զարգացման համար անհրաժեշտ է համալիր մոտեցում, որը ներառում է ոչ միայն գյուղատնտեսության, այլև կանանց աշխատանքի տեղավորման հարցի լուծումը։

Կարապետյանը նշել է, որ Հայաստանում կանանց համար ամենահեռանկարային ուղղություններից մեկը տեքստիլ արդյունաբերության զարգացումն է։ Նրա խոսքով՝ այս ոլորտը կարող է դառնալ մարզերում նոր աշխատատեղերի ստեղծման հիմնական աղբյուրը։ «Հենց տեքստիլը կապահովի աշխատատեղեր։ Ժամանակին Հայաստանում այս ոլորտում հարյուր հազարավոր մարդիկ են աշխատել։ Մենք ասում ենք, որ այստեղ կստեղծենք տեքստիլ արդյունաբերություն, կհիմնվի տեքստիլ ֆաբրիկա, որպեսզի կանայք աշխատանք ունենան»,- ասել է նա՝ ընդգծելով, որ այս ոլորտի վերակենդանացումը կօգնի ոչ միայն կանանց, այլև ամբողջ համայնքներին։

Կարապետյանը նաև անդրադարձել է գյուղատնտեսության առջև ծառացած մարտահրավերներին, հատկապես՝ ծիրանի արտադրության և իրացման հետ կապված խնդիրներին։ Նա նշել է, որ գլխավոր խոչընդոտներից մեկը մթերման կետերի բացակայությունն է, ինչի հետևանքով սեզոնին ծիրանի գները կտրուկ նվազում են, և ֆերմերները չեն կարողանում իրենց աշխատանքի արդյունքը շահավետ վաճառել։

«Ուժեղ Հայաստան» կուսակցության առաջարկությամբ՝ պետությունը պետք է ակտիվորեն ներգրավվի գյուղատնտեսական ենթակառուցվածքների ստեղծման գործում։ Կուսակցության ծրագրում նախատեսվում է Հայաստանի տարբեր մարզերում ստեղծել մթերման կենտրոններ և սառնարանային տնտեսություններ։ Այս կառույցները կգնեն ֆերմերների բերքը նախապես սահմանված, արդար գնով և կապահովեն դրա արագ և անվտանգ արտահանումը արտասահմանյան շուկաներ։ «Մենք վերջապես կկարողանանք հայկական արտադրանքը վաճառել այն գնով, որով այն փաստացի գնվում է արտերկրում, իսկ այնտեղ գինը մի քանի անգամ բարձր է»,- ասել է Կարապետյանը՝ հավելելով, որ անհրաժեշտ է լուծել նաև «Լարս» անցակետի հետ կապված տրանսպորտային և մաքսային խնդիրները, որպեսզի գյուղմթերքի արտահանումն իրականացվի առանց որևէ կորուստի։