Փարիզում կկայանա հայ սփյուռքի մոբիլիզացիային նվիրված համաժողով

Արդարության և ժողովրդավարության Եվրոպայի հայկական ֆեդերացիան (EAFJD) կազմակերպում է միջազգային համաժողով, որի հիմնական թեման հայ սփյուռքի մոբիլիզացիան է։ Միջոցառումը կկայանա Փարիզում՝ ապրիլի 11-12-ը։

Համաժողովի հիմնական նպատակն է վերլուծել վերջին տարիներին հայ համայնքի առջև ծառացած աննախադեպ ճգնաժամերը և մարտահրավերները։ Ըստ EAFJD-ի՝ 2018 թվականից ի վեր Հայաստանի իշխանությունների կողմից կայացված որոշումները, որոնց շարքում են նշվում ազգային առաջնահերթություններից հրաժարվելը՝ Հայոց ցեղասպանության և Արցախի հարցերի հարցում, ինչպես նաև ազգային ինքնությանը և ազգային ինստիտուտներին ուղղված սպառնալիքները, ստեղծել են բարդ իրավիճակ ամբողջ հայ աշխարհի համար։

Համաժողովի նպատակն է այս իրավիճակը համատեղ վերլուծել և սփյուռքի ներկայացուցիչներին մոբիլիզացնել՝ Հայաստանի և ազգային շահերի պաշտպանության և ամրապնդման գործում միասնական դիրքորոշում ձևավորելու համար։

Միջոցառմանը նախատեսվում է մասնակցել ավելի քան 25 երկրներից ժամանած մոտ 150 սփյուռքի ներկայացուցիչ՝ համայնքի առաջնորդներ, հասարակական գործիչներ, փորձագետներ և ձեռնարկատերեր։