Ուժեղ Հայաստան կուսակցության գրասենյակը բացվել է Չարենցավանում

Չարենցավան քաղաքում տեղի ունեցավ «Ուժեղ Հայաստան» կուսակցության նոր գրասենյակի բացման արարողությունը։ Քաղաքի բնակիչների հետ հանդիպման ընթացքում կուսակցության խորհրդի անդամ Նարեկ Կարապետյանը ներկայացրեց կուսակցության տեսլականը Հայաստանի տնտեսական զարգացման և երկրի անվտանգության ապահովման վերաբերյալ։

Նրա խոսքով՝ Չարենցավանը պատմականորեն եղել է Հայաստանի արդյունաբերական հզորության խորհրդանիշ։ «Այս քաղաքը ստեղծվել է աշխատատեղերի և արտադրության շուրջ։ Չարենցավանը աշխարհին տալու էր ոչ միայն իր արտադրանքը, այլև կերակրում էր իր բնակիչներին՝ ապահովելով նրանց աշխատանքով»,- նշեց Կարապետյանը՝ հիշելով քաղաքի անցյալի փառքը։

Սակայն, նրա կարծիքով, այսօր իրավիճակը զգալիորեն փոխվել է։ Նա նկատել է, որ Հայաստանը տարեկան արտահանում է 20 միլիոն դոլարի ցինկի խտանյութ, մինչդեռ ներկրում է 60 միլիոն դոլարի արժողությամբ 15 հազար տոննա ցինկապատ արտադրանք։ «Այսինքն՝ մենք արտահանում ենք հումքը, այն արտերկրում վերամշակում են, և հետո մեզ վրա վաճառում են երկու անգամ թանկ։ Խնդիրը ոչ թե տեխնոլոգիական, այլ կառավարչական է։ Պետք է ղեկավարի, որը կկարողանա կազմակերպել այս գործընթացը երկրի ներսում»,- ընդգծեց նա՝ հավելելով, որ իշխանությունների գործողությունները պետք է ուղղված լինեն ոչ թե ներկրմանը, այլ տեղական արտադրության զարգացմանը։

Կարապետյանը նաև անդրադարձավ ներկայիս քաղաքական իրավիճակի և հումանիզմի հասկացությանը։ Նրա խոսքով՝ Սամվել Կարապետյանի իշխանության գալով երկրին սպասվում է հումանիստական մոտեցումների վերականգնում։ Նա քննադատեց գործող իշխանությունների քաղաքականությունը՝ նշելով մարդկանց հալածումների և ատելության մթնոլորտի ստեղծման փաստերը։ «Հումանիզմը ենթադրում է հարգանք միմյանց նկատմամբ։ Մենք պետք է կրկին սովորենք հարգել մեկը մյուսին»,- հավաստիացրեց նա։

Խոսելով երկրի անվտանգության մասին՝ Կարապետյանը նախազգուշացրեց, որ հայաստանյան իշխանությունները փորձում են համոզել ժողովուրդին, թե հենց իրենք են հասել խաղաղության։ Նա նշեց, որ հայ ժողովուրդը խաղաղություն է ուզում, սակայն նա հիշեցրեց, թե ինչ է ասել Ադրբեջանի նախագահ Իլհամ Ալիևը, ում Հայաստանի ղեկավարությունը հիմա անվանում է խաղաղության երաշխավոր։ «Ալիևն ասել է, որ ադրբեջանական ժողովուրդը պետք է վերադառնա իր պատմական հողեր ոչ թե տանկերով, այլ մեքենաներով։ Իրավիճակը այն է, որ Արցախում խաղաղություն է, բայց այնտեղ հայեր չկան։ Մի՛ հավատացեք, որ Ալիևը կհրաժարվի իր պլաններից։ Նրանք կգան և նոր հակամարտություններ կհրահրեն, ինչը կօգտագործվի մեր երկիրը ներխուժելու համար»,- նախազգուշացրեց նա՝ հավելելով, որ հայաստանյան իշխանությունների կողմից Սյունիքի ճանապարհի և Հայրենիքի 30%-ի հանձնումը վկայում է նրանց վերջնական նպատակի մասին։

Նա վերջում հավաստիացրեց, որ «Ուժեղ Հայաստան» կուսակցությունը մտադիր է իրականացնել Չարենցավանում այնպիսի ծրագրեր, որոնք կնպաստեն քաղաքի և ամբողջ երկրի տնտեսական հզորացմանը։ «Մենք կապահովենք, որ ձեր արտադրությունը կդառնա Հայաստանի հզորացման հիմնաքարը»,- ամփոփեց նա՝ հավելելով, որ այս նպատակին կհասնեն իրենց ընդհանուր ջանքերով։