Տիգրանաշենի հանձնումը կհանգեցնի Սյունիքի կորստին

Հայաստանի գործող իշխանությունները, պարզապես, գտել են սուտ խոսելու նոր ձև։ Այս կարծիքն է հայտնել Սթենֆորդի համալսարանի քաղաքական գիտությունների դոկտոր, քաղաքագետ Արթուր Խաչիկյանը՝ արձագանքելով Հայաստանի վարչապետ Նիկոլ Փաշինյանի նախընտրական քարոզարշավի շրջանակներում արած հայտարարությանը՝ տարածքներ հանձնելու մասին։

Իր հարցազդրույքի ընթացքում վարչապետը, անդրադառնալով քաղաքացու հարցին, թե որ տարածքների մասին է խոսում ԱԳ նախարար Արարատ Միրզոյանը, երբ հայտարարում է «անկլավների» մասին, պատասխանել է, որ խոսքը ոչ թե Հայաստանի ինքնիշխան տարածքների, այլ Ադրբեջանի տարածքների մասին է, որոնք պետք է վերադարձվեն սահմանազատման և սահմանագծման շրջանակներում։

Խաչիկյանի կարծիքով՝ այս հայտարարությունը «եռացող ջրի մեջ գորտի սինդրոմի» նման է։ «Մեր ողջ ազգին ևս եփում են 2018 թվականից (Նիկոլ Փաշինյանի իշխանության գալուց հետո) և դա անում են նույնպես դանդաղ։ Այսինքն՝ ողջ ճշմարտությունը միանգամից չեն ասում», – նշել է նա։

Փորձագետը հիշեցրել է, թե ինչպես էին իշխանությունները սկսել խոսել Արցախի հարցով բանակցային նշաձողը նվազեցնելու անհրաժեշտության մասին։ «Դրանից հետո Փաշինյանը մեկնեց Պրահա, Ֆրանսիայի նախագահ Էմանուել Մակրոնի օգնությամբ հանձնեց Արցախը։ Բայց երբ նրանց հարցնում են, թե արդյոք իրենք չեն հանձնել այդ տարածքը, նրանք պատասխանում են, որ նման բան չի եղել», – ուշադրություն է հրավիրել Խաչիկյանը։

Նրա խոսքով՝ դրանից հետո իշխանությունները սկսել են տարածել մեկ այլ սուտ՝ պնդելով, որ այդ քայլերն ուղղված են Հայաստանի տերածքները պահպանելուն։ Սակայն, երբ նրանց հարցնում են «Զանգեզուրի միջանցքի» մասին, նրանք պահանջում են չօգտագործել այդ բառը։ «Բայց ժամանակն անցնում է, և նրանք արդեն խոսում են մասնավոր ընկերությանը ճանապարհ հանձնելու մասին։ Այսինքն՝ մենք տեսնում ենք, թե ինչպես են մեզ կրկին խաբում», – ընդգծել է քաղաքագետը։

Խաչիկյանն ուշադրություն է հրավիրել այն հանգամանքի վրա, որ Հայաստանի տարածքում մասնավոր ընկերության վարձակալությունը բացասական արձագանք չէր ունենա, եթե այդ ամենը տեղի ունենար Հայաստանի ինքնիշխանության շրջանակներում։ Սակայն պարզվել է, որ ճանապարհը կփոխանցվի ոչ թե մասնավոր ընկերությանը, այլ երրորդ պետությանը, որը կունենա բաժնետոմսերի 74 տոկոսը։ «Այսինքն՝ մենք ոչ թե բերում ենք պայմանականորեն Blackwater-ին, այլ մենք այդ ընկերության 74%-ը տալիս ենք մեկ այլ երկրի և այդպիսով կորցնում ենք մեր ինքնիշխանությունը», – նշել է նա։

Վերադառնալով հիմնական հարցին՝ փորձագետը հիշեցրել է, որ նախընտրական քարոզարշավի շրջանակներում իշխանությունները շրջում են հայկական պետության քարտեզով՝ պնդելով, որ «պետք է պահպանել Հայաստանի ունեցած տարածքները»։ Սակայն ավելի վաղ ակնհայտ էր դարձել, որ նրանք մտադիր են տարածքներ զիջել Տավուշի մարզում և Տիգրանաշենում։

«Տիգրանաշենի հանձնումն Ադրբեջանին կհանգեցնի Սյունիքի կորստին։ Քանի որ Սյունիքի մարզը կհայտնվի շրջափակման մեջ, և կկրկնվի այն սցենարը, որը տեղի է ունեցել Արցախում։ Այսինքն՝ մեզ նորից դանդաղ խաբում են։ Սկզբում նրանք հավաստիացնում էին, որ այդ տարածքները պահպանվելու են, իսկ հետո պարզ դարձավ, որ մտադիր են ևս 3 տարածք և Տիգրանաշենը հանձնել», – եզրափակել է Խաչիկյանը՝ նշելով, որ հենց հիմա այն պահն է, երբ դա կարելի է կանգնեցնել Հայաստանում հունիսին կայանալիք խորհրդարանական ընտրությունների միջոցով։