«Ուժեղ Հայաստան» կուսակցությունը ներկայացրել է Աղքատության հաղթահարման հիմնադրամ ստեղծելու նախաձեռնություն

«Ուժեղ Հայաստան» կուսակցությունը հայտարարել է Աղքատության հաղթահարման հիմնադրամ ստեղծելու նոր նախաձեռնության մասին։ Այս մասին կուսակցության քաղխորհրդի անդամ Նարեկ Կարապետյանը հայտնել է՝ հրապարակելով տեսանյութ իր Facebook-ի էջում։

Ըստ Նարեկ Կարապետյանի՝ հիմնադրամի հիմնական նպատակը անապահով ընտանիքների համար ջրի և էլեկտրաէներգիայի ծախսերի ծածկումն է։ Նա նշել է, որ այս քայլի շնորհիվ Հայաստանում ոչ մի ընտանիք այլևս չի վճարի այդ ծառայությունների համար։ Կուսակցության ներկայացուցիչը պնդում է, որ հիմնադրամի միջոցները, որոնք կներդրվեն կուսակցության գործընկերների և սփյուռքի ներկայացուցիչների կողմից, կնպաստեն աղքատության վերջնական հաղթահարմանը։

«Մարդիկ այլևս ստիպված չեն լինի իրենց վերջին գումարները տալ այդ ծառայությունների դիմաց», – նշել է Նարեկ Կարապետյանը՝ ընդգծելով նախաձեռնության կարևորությունը։

Իր հերթին, «Ուժեղ Հայաստան» դաշինքի առաջնորդ Սամվել Կարապետյանը հանդես է եկել հայտարարությամբ՝ երաշխավորելով նախաձեռնության, ինչպես նաև դաշինքի կողմից ներկայացված մնացած բոլոր տնտեսական ծրագրերի իրականացումը։ Նա շնորհակալություն է հայտնել հայ ժողովրդին ցուցաբերած աջակցության համար՝ հատկապես նշելով հունիսի 3-ին Հանրապետության հրապարակում տեղի ունեցած հանրահավաքին մասնակցած տասնյակ հազարավոր քաղաքացիներին, ովքեր պայքարում են գործող ղեկավարությանը իշխանությունից հեռացնելու համար։

«Ես կոչ եմ անում մեր ժողովրդին․ տվեք մեզ ձեր ժամանակից 5 րոպե և եկեք ընտրատեղամասեր, իսկ մենք ձեզ բարեկեցիկ կյանք և ուժեղ Հայաստան ենք տալու։ Դուք արժանի եք փոփոխությունների», – եզրափակել է Սամվել Կարապետյանը։

Հիշեցնենք, որ Հանրային հեռուստատեսության բանավեճի ժամանակ Նարեկ Կարապետյանը հայտարարել էր, որ այսօր Հայաստանում աղքատության մեջ ապրում է 650 հազար մարդ։ Նրա խոսքով՝ աղքատության հաղթահարման համար անհրաժեշտ է նոր աշխատատեղեր ստեղծել։ Ըստ նրա՝ կուսակցությունը իշխանության գալու դեպքում նպաստ կտրամադրի ծայրահեղ աղքատության մեջ գտնվող քաղաքացիներին՝ 150000 դրամի չափով։

Ավելի վաղ «Ուժեղ Հայաստան» դաշինքի անդամ Արամ Վարդևանյանը հայտնել էր, որ 2021 թվականին Հայաստանի աղքատ բնակչության ցուցանիշը կազմել է 27 տոկոս։ Մինչդեռ, իշխող «Քաղաքացիական պայմանագիր» կուսակցության նախընտրական խոստումների համաձայն, այդ ցուցանիշը պետք է երկու անգամ նվազեր։ Ըստ վերջին պաշտոնական տվյալների՝ երկրում աղքատության մակարդակը կազմում է մոտ 22 տոկոս, իսկ ծայրահեղ աղքատության մեջ գտնվում է մոտ 30 հազար մարդ։