Քաղաքացիական պայմանագիր կուսակցությունից երկու պատգամավոր հրաժարվում են մանդատներից

Հայաստանի Հանրապետության Ազգային ժողովի 9-րդ գումարման երկու նորընտիր պատգամավոր՝ Թալին համայնքի ղեկավար Տավրոս Սափեյանը և Վաղարշակ Հակոբյանը, որոշում են կայացրել հրաժարվել իրենց պատգամավորական մանդատներից։

Ինչպես հայտնի է դարձել, Տավրոս Սափեյանը մտադիր է շարունակել իր աշխատանքը Թալին համայնքի ղեկավարի պաշտոնում։ Այս մասին նա հայտնել է իր Facebook-ի էջում՝ նշելով, որ իր որոշումը հիմնված է եղել համաքաղաքացիների վստահության և կամքի վրա։

«Ուզում եմ տեղեկացնել, որ հեռանում եմ Ազգային ժողովի պատգամավորի պաշտոնից և շարունակելու եմ աշխատել որպես Թալին համայնքի ղեկավար։ Ես այս որոշումը կայացրել եմ՝ առաջնորդվելով իմ համաքաղաքացիների վստահությամբ, նրանց արտահայտած կամքով ու համոզմունքով, որ այսօր առավել օգտակար կարող եմ լինել հենց այստեղ՝ ձեր կողքին։ Ինձ համար ժողովրդի վստահությունն ու կարծիքը եղել և մնում է գերագույն պատասխանատվություն։ Այս որոշումը երկար մտածված էր և հիմնված էր մի պարզ համոզմունքի վրա. այսօր իմ գլխավոր առաքելությունն ու խնդիրն այստեղ է՝ Թալինում», – նշել է Սափեյանը։

Իր հերթին, Վաղարշակ Հակոբյանը հայտնել է, որ մտադիր է շարունակել իր գործունեությունը մասնավոր հատվածում։ Նա նշել է, որ 9-րդ գումարման Ազգային ժողովի պատգամավորի մանդատից հրաժարվելու իր դիմումը պաշտոնապես կներկայացվի Հայաստանի Հանրապետության Կենտրոնական ընտրական հանձնաժողով։

Հակոբյանը շնորհակալություն է հայտնել վարչապետ Նիկոլ Փաշինյանին՝ 2018 թվականի հեղափոխությունից հետո քաղաքացուն վերադարձնելու համար ընտրելու իրավունքը։ Նա նաև բարձր է գնահատել Ազգային ժողովի և «Քաղաքացիական պայմանագիր» խմբակցության դերը՝ նշելով, որ իրեն պատիվ է եղել լինելու այդ կուսակցության անդամ։

Վաղարշակ Հակոբյանը նաև ընդգծել է, որ իր որոշումը կայացվել է վարչապետի և «Քաղաքացիական պայմանագիր» կուսակցության վարչության համաձայնությամբ։ Նա հավելել է, որ մնում է կուսակցության անդամ և կշարունակի ակտիվորեն մասնակցել կուսակցական գործունեությանը՝ համակողմանի աջակցություն ցուցաբերելով իր քաղաքական թիմին։