Վարչապետ Նիկոլ Փաշինյանի նախաձեռնությամբ տեղի է ունեցել խորհրդակցություն, որի ընթացքում մանրամասն քննարկվել է պետական կառավարման համակարգում կատարողականի գնահատման և բարեփոխումների խրախուսման փորձնական ծրագրի ընթացքը։
Փոխվարչապետ Տիգրան Խաչատրյանը ներկայացրել է ծրագրի ընթացքի ամփոփ զեկուցում։ Այն ներառում էր կատարված վերլուծությունների արդյունքները, սոցիալական երաշխիքների կառուցվածքը և օրենսդրական նորմերը, որոնք անհրաժեշտ են ծրագրի շարունակականության համար։ Քննարկման օրակարգում էին նաև մարդկային ռեսուրսների և մասնագիտական կարողությունների զարգացման ուղղված քայլերը, ինչպես նաև մոտիվացիոն մեխանիզմների մշակման հարցերը՝ համապատասխանելով նոր պահանջներին։
Ամփոփելով քննարկումները՝ վարչապետը ընդգծել է ծրագրի արդյունքների շարունակական վերլուծության կարևորությունը։ Նրա կարծիքով՝ այս վերլուծությունները պետք է հիմք հանդիսանան ինստիտուցիոնալ փոփոխությունների համար, որոնք կնպաստեն ոչ միայն մրցունակ կադրերի պահպանմանը, այլև նոր աշխատակիցների ներգրավմանը։
Հիշեցնենք, որ ՀՀ կառավարությունը նոյեմբերի 27-ին հաստատել էր բարձր արտադրողականություն ցուցաբերող և ինքնակրթությամբ զբաղվող պետական ծառայողների կատարողականի գնահատման և խրախուսման փորձնական ծրագիրը։ Ըստ պլանների՝ ծրագրի շահառուները պարտավոր կլինեն ինքնակրթության համար օգտագործել խրախուսական միջոցների առնվազն 10%-ը։ Փորձնական ծրագրի իրականացման համար 2025 թվականի պետական բյուջեից նախատեսված էր մոտ 3 միլիարդ դրամ։
Արդյունքում՝ 2025 թվականի վերջին բարձրաստիճան պետական պաշտոնյաները ստացել են բազմամիլիոն դրամանոց պարգևավճարներ։ Ըստ հաղորդագրությունների՝ գերատեսչությունների ղեկավարները ստացել են մոտ 1.5-2 միլիոն դրամ, գերատեսչությունների ղեկավարները՝ 2.5-3 միլիոն դրամ, փոխնախարարները՝ 3.5-4.5 միլիոն դրամ, իսկ նախարարները՝ մինչև 6-7 միլիոն դրամ։ ՀՀ արդարադատության նախարար Սրբուհի Գալյանը հաստատել է, որ հարկերից հետո ստացել է 6-7 միլիոն դրամ պարգևավճար։
