«ՀայաՔվե» ազգային քաղաքացիական միավորումը հայտարարել է, որ վարչապետ Նիկոլ Փաշինյանը փետրվարի 25-ի առավոտյան հայտնել է ապրիլի 1-ից կենսաթոշակների բարձրացման մասին։
Ըստ միավորման՝ այս քայլը սոցիալապես խոցելի ամենամեծ խավին՝ կենսաթոշակառուներին, տրվող «կաշառք» է, որի միակ նպատակը վարչախմբի վերարտադրությունն է։
«ՀայաՔվե»-ն նշում է, որ իր վեցամսյա պայքարը կենսաթոշակների բարձրացման հարցում տվեց իր առաջին արդյունքը, թեև «խիստ մասնակի»։ Միավորումը կարծում է, որ մինչև 10 հազար դրամով կենսաթոշակների բարձրացումը բնավ այն նշաձողը չէ, որը մենք սահմանել ենք։
«Անհարկի պետական ծախսերի կրճատման հաշվին հնարավոր է շատ ավելի բարձրացնել կենսաթոշակների չափը, և էապես բարելավել մեր տարեց հայրենակիցների կյանքը», – ասվում է հայտարարությունում։
«ՀայաՔվե» միավորումը հաստատակամ է կենսաթոշակների առնվազն 50 տոկոսով բարձրացման իր հանձնառության հարցում և բնավ չի դիտարկում վարչախմբի այս քայլը որպես համակարգային լուծում։ Միավորումը հայտարարում է, որ կշարունակի պայքարել մոտ կես միլիոն կենսաթոշակառու հայրենակիցների կենսամակարդակի բարելավման և այս «հակազգային և ստահոդ վարչախմբի» իշխանությունից հեռացման համար։
Վարչապետը նշել է, որ կենսաթոշակների բարձրացումը հնարավոր է դարձել 2025 թվականին տնտեսական բարձր աճի շնորհիվ, որն ավելի մեծ էր, քան կանխատեսվում էր։
