ՀՀ քննչական կոմիտեի կողմից հարուցված քրեական գործի նախաքննության ընթացքում առերևույթ են դարձել փաստական տվյալներ, որոնք վկայում են անձի կողմից համակարգչային խարդախություն և փողերի լվացում կատարելու մասին։
Ըստ հաղորդագրության՝ Մ.Ա.-ն 2021 թվականի հունիսի 24-ից մինչև 2022 թվականի նոյեմբերի 15-ն ընկած ժամանակահատվածում, հանցավոր ճանապարհով ֆինանսական միջոցներ ձեռք բերելու նպատակով, ապօրինի հասանելիություն է ստացել տարբեր կայքերում գրանցված խաղային և վճարահաշվարկային կազմակերպությունների հաշվառման հաշիվներին։ Այս գործողությունների միջոցով նա հափշտակել է անձանց խաղային հաշիվներին և կցված բանկային քարտերին առկա ընդհանուր՝ 3 մլն 398 հզր 350 ՀՀ դրամ գումարը։
Հափշտակված միջոցները Մ.Ա.-ն փոխանցել է տարբեր կայքերում այլ անձանց անվամբ գրանցված և իր կողմից փաստացի կառավարվող խաղային, էլեկտրոնային դրամապանակների հաշիվներին՝ դրանք տնօրինելու հնարավորություն ստանալու համար։
Բացի այդ, հանցավոր ճանապարհով ձեռք բերված գումարների ծագման աղբյուրը և իրական բնույթը թաքցնելու նպատակով Մ.Ա.-ն իր կողմից կառավարվող հաշիվներից մյուս հաշիվներին փոխանցումներ է կատարել։ Նա նոր հաշվում առաջացած գումարը որպես խաղադրույքի արդյունքում առաջացող հաղթանակ ցուցադրելով, խաղադրույքներով և կանխիկացումներով կատարել է փողերի լվացում։
Մ.Ա.-ի նկատմամբ հարուցվել է հանրային քրեական հետապնդում՝ Քրեական օրենսգրքի 257-րդ հոդվածի 2-րդ մասի 3-րդ կետով (խոշոր չափերով համակարգչային հափշտակությունը) և 296-րդ հոդվածի 1-ին մասով (փողերի լվացումը)։ Քրեական վարույթը մեղադրական եզրակացությամբ ուղարկվել է հսկող դատախազին՝ այն հաստատելու և ըստ էության քննության առնելու համար դատարան ուղարկելու միջնորդությամբ։
