Երևանցիների մոտ կեսը դրական է գնահատում ոստիկանության փոփոխությունները

Հունվարի 19-23-ը կատարված հարցման համաձայն՝ Երևանի բնակիչների մոտ կեսը դրական է գնահատում վերջին ոստիկանական փոփոխությունները։ Այս տվյալները հրապարակվել են MPG խորհրդատվական ընկերության կողմից իրականացված «Դիսկոտեկա ավարիա» հարցման արդյունքների համաձայն։

Հարցվածների մեծ մասը, 14,8%-ը, նշել է, որ միանգամայն դրական է գնահատում ոստիկանության նոր կառուցվածքը և գործելակերպը։ 30,6% -ը հայտնել է, որ փոփոխությունները գնահատում է ավելի շուտ դրական։

Հարցվածների 20,1%-ը նշել է, որ փոփոխություններ նկատել չի, իսկ 7,3%-ը դրանք անվանել է ավելի շուտ բացասական։ Բացարձակ բացասական գնահատական տվել է հարցվածների 12,6%-ը, իսկ 14,5%-ը դժվարացել է տալ որևէ գնահատական։

Հարցմանը մասնակցածների կեսից ավելին՝ 68,7%, հայտնել է գոհունակություն Հայաստանի պարեկային ծառայության աշխատանքից։ 25,1% -ը նրանց աշխատանքը համարել է միանգամայն դրական, իսկ 43,6%-ը՝ ավելի շուտ դրական։ Բացասական գնահատական տվել է 23,3% -ը՝ 12,5% «ավելի շուտ բացասական» և 10,8% «բացարձակ բացասական»։ 8,3% -ը դժվարացել է պատասխանել։

Հարցումն իրականացվել է հեռախոսազանգերի միջոցով՝ Երևանի բնակիչների շրջանում։ Ընտրանքի ծավալը կազմել է 601 մարդ, իսկ ընտրանքի սխալանքը՝ + / – 3,8%։

MPG ընկերությունը 2011 թվականից աշխատում է որպես աշխարհում հասարակական կարծիքի ուսումնասիրման ամենահեղինակավոր կազմակերպություններից մեկի՝ Gallup միջազգային ասոցիացիայի պաշտոնական ներկայացուցիչ Հայաստանում։ 2003 թվականից ի վեր ընկերությունը իրականացրել է ավելի քան 800 սոցիոլոգիական և մարքեթինգային հետազոտություն։