Հայաստանի վարչապետ Նիկոլ Փաշինյանի հետ բանակցություններից հետո Երևանում կատարած հայտարարության ժամանակ ԱՄՆ փոխնախագահ Ջեյ Դի Վենսը նշել է, որ Միացյալ Նահանգների նախագահ Դոնալդ Թրամփը և վարչապետ Փաշինյանը միասին հասել են շատ մեծ արդյունքի։
Վենսը նշել է, որ խաղաղությունը և բարգավաճումը ստեղծվում են ապագայում՝ ոչ թե անցյալի հաշվարկների հիման վրա։ Նրա խոսքով՝ Հայաստանի վարչապետը, համագործակցելով ԱՄՆ նախագահի հետ, գրանցել է նման լուրջ առաջընթաց։
«Մենք միասին ձևավորում ենք ոչ միայն խաղաղություն Հայաստանի համար, այլև՝ բարգավաճում ԱՄՆ-ի հետ համատեղ։ Այսօր մենք ուզում ենք հայտարարել այնպիսի բաների մասին, որոնք հնարավոր չէին լինի առանց ձեր առաջնորդության և նվիրվածության, ինչպես նաև՝ առանց մեր երկրի նախագահի առաջնորդության։ Ես իրոք համոզված եմ, որ այսօր սկսվում է Հայաստանի և ԱՄՆ-ի միջև գործընկերության նոր փուլ», – ասել է Վենսը։
ԱՄՆ փոխնախագահն ընդգծել է, որ Միացյալ Նահանգները հպարտությամբ հաստատել է NVIDIA ընկերության մի շարք լիցենզիաներ։ Նրա խոսքով՝ դա նշանակում է նոր շուկաներ և նոր աշխատատեղեր՝ ինչպես ամերիկյան ընկերությունների, այնպես էլ Հայաստանի համար։
«Խոսքը չիպերի մասին է, որոնք չկան և չեն կարող լինել աշխարհի երկրների մեծ մասում։ Այժմ դրանք կառուցվելու են այստեղ և արդեն կառուցվում են՝ վարչապետի առաջնորդության շնորհիվ։ Մենք անկեղծորեն շնորհակալություն ենք հայտնում պարոն վարչապետին և Հայաստանի ժողովրդին», – ավելացրել է Վենսը։
