Փարիզում ՀՀ ԱԳ նախարարը հանդիպում է ունեցել ԱՄՆ պետքարտուղարի տեղակալի հետ

Հայաստանի արտաքին գործերի նախարար Արարատ Միրզոյանը Փարիզում հանդիպում է ունեցել ԱՄՆ պետքարտուղարի սպառազինությունների վերահսկման և միջազգային անվտանգության հարցերով տեղակալ Թոմաս Դինանոյի հետ։

Հանդիպման ընթացքում զրուցակիցները քննարկել են տարբեր ուղղություններով Հայաստան-ԱՄՆ ռազմավարական գործընկերության խորացման հարցերը։

Միջոցառման ընթացքում Արարատ Միրզոյանը և Թոմաս Դինանոն ողջունել են Միջուկային էներգիայի խաղաղ նպատակներով օգտագործման ոլորտում Հայաստան-ԱՄՆ կառավարությունների միջև համագործակցության մասին համաձայնագրի բանակցությունների ավարտը։ Նրանք ընդգծել են համապատասխան ձևաչափով համաձայնագրի ստորագրման և հետագա փոխգործակցության իրականացման պատրաստակամությունը։

Զրույցի ընթացքում անդրադարձ է կատարվել նաև տարածաշրջանային ենթակառուցվածքային ծրագրերի հարցին։ Բացի այդ, զրուցակիցները փոխանակվել են մտքեր փոխադարձ հետաքրքրություն ներկայացնող այլ հարցերի շուրջ։

Հիշեցնենք, որ ԱՄՆ փոխնախագահ Ջեյ Դի Վենսի Հայաստան կատարած այցի շրջանակներում հայտարարվել էր Երևանի և Վաշինգտոնի միջև միջուկային էներգիայի խաղաղ օգտագործման ոլորտում համագործակցության մասին համաձայնագրի շուրջ բանակցությունների ավարտի վերաբերյալ հայտարարության ստորագրման մասին։